Dissabte lo 6 de març, LIBERTAT-Lengadòc s'es rendut a Sèta per manifestar son oposicion a l'implantacion en Lengadòc de l'entrepresa AGREXCO, sostien actiu de las colonias israelianas en territòri palestinian.
Aprèp l'arrivada de la caminada partida de Montpelhièr lo matin, mai d'una delegacion a près la paraula. Un paisan palestinian nos a contat lo calvari quotidian de tot un pòble e l'impossibilitat d'exportar las produccions agricòlas de Cisjordania, en causa deus barratges recurents de l'armada d'aucupacion israeliana.
Aquel discors foguèt completat per un intervenant de l'Union Judiva Francesa per la Patz, deplorant la politica d'Israèl que far pojar l'antisemitisme mas tanben las entenudas entre lo CRIF e l'Estat ebrèu. Un cineasta israelian es vengut testimoniar son desgost de la colonizacion israeliana e a aperat a boicotar totalament aquel Estat.
Aquò es l'enjòc. Per far plegar Israèl i a pas mila solucions, lo fau atacar en lo sector mai sensible: lo de l'economia. Per aquò devem boicotar totalament las produccions israelianas. Mes aquò sufeis pas. Devem tanben far pression per lo boicòt en tots los domènis: esportiu, scientific, cultural, etc. Es aital que l'Estat colon tornarà pensar lo tractament que fa endurar als palestinians e començarà de respectar lo dreit internacional.
L'intervencion de la Confederacion Paisana foguèt tanben pron interessanta perqué anava en lo sens de nòstre vision, es a dire que Lengadòc e Occitània podon aisitament estre autò-sufisents en produch agricòl e an pas mestièr d'importar fruchs e legumas. Cal pas oblidar a d'aquel perpaus que l'agricultura occitana es en crisi, notadament la viticultura lengadociana. Lo sénher Frêche, instigator de la venguda d'Agrexco per nòstre, serià mai avisat de lançar un gran plan de reconversion agricòl deu vinhau a l'entorn de la policultura, deus fruchs e legumas, puslèu que de finançar lo colonizator sionista de 200 milions d'euròs, amb l'argent public de la Region.

Los 14 e 21 de març que's debanaràn las eleccions regionaus en Exagòne. Per rasons practicas, n'ei pas possible per nosauts de presentar nada lista en las regions on militam. Se amassam un bon nombre de simpatisants, lo movement noste qu'ei enqüèra tròp joen entà assumir aqueth tribalh.

Totun com estó precisat quan e's creè a l'abòr de 2009, LIBERTAT non e's vira pas de cuu a las eleccions. Per los ans a viéner, los escrutins locaus que seràn tà nosauts l'escadença de perpausar a la populacion un programa politic ambiciós e radicaument diferent de'us que coneishem au dia de uei.

Las nostas ideas d'autogestion, de revolucion sociau, de partatge deus riquèrs, tot com lo dret deus occitans a autoderterminà's, non las arretrobam pas en las listas presentas per aqueras eleccions francesas.

Se tots los programas ne son pas de hicar suu medish plan per çò qui ei deu desvelopament de la diversitat culturau o de la critica deu sistèma capitalista en plaça, qu'arrefusam d'entrar en lo jòc deu « mensh piéger ». Aqueth vòte « per defaut » n'ei pas ua solucion e qu'a tostemps decebut peu passat.

Atau LIBERTAT non sostienerà pas nada lista entà d'aqueras eleccions regionaus, au purmèr com au segon torn. Aquera posicion n'ei pas la d'un mouvement « jusqu'au-boutiste » mes d'un movement qui arrefusa los compromès electoralistas shens vertadèr fondament politic. Arron lo 21 de març, las regions que seràn shens nat dobte gavidadas un còp mei peus socialistas, ua situacion qui non portarà pas nat espèr de progrès sociau entà las classas mei praubas.

Delà de las escadenças politicas, LIBERTAT que luta entà bastir l'unitat populara de cap tà un cambiament de societat radicau e eficaç, e qu'incita tots los e las qui vòlen tribalhar dens aqheth sens a juntà'ns.

Los pòbles guadalopenc, grec … que ns'an amuishat lo camin, nosauts tanben en Occitània organizem la ripòsta contra aqueth sistèma injuste.

Volem víver e decidir au país !